Kur kanë kaluar vetëm pak orë nga shpërthimet që tronditën Vlorën pak pas mesnate, të tjera detaje kanë dalë. Ngjarja e parë ka ndodhur në lagjen “Lirim” përballë Drejtorisë së Policisë vendore, ku tritoli është vendosur në katin e 5-të të një pallati.
Burime për Gazeta Shqiptare kanë bërë të ditur se tritoli është vendosur në sheshpushimin përpara banesës së 30-vjeçarit, Fatjon Bata, i cili e kishte blerë apartamentin vetëm pak muaj më parë.
Ky dyshohet se është edhe “shënjestra” e shpërthimit, ndonëse policia bëri të ditur se ai nuk njihet si person me precedent të mëparshëm penal. Pas shpërthimit, burime për Gazeta Shqiptare bënë të ditur se nëna e Fatjon Batës, Nadirja ka përfunduar në spital, për shkak të tronditjes.
Ndërkaq, ngjarja e dytë ka ndodhur në lagjen “15 tetori” pranë bashkisë. Kur kishte kaluar 1 orë, Vlora është zgjuar sërish nga shpërthimi i dytë, ku në oborrin e banesës së një 69-vjeçari është vendosur një sasi tritoli.
Ashtu siç edhe bëhet e ditur, kamerat e sigurisë kanë filmuar dy persona që hodhën në oborr sasinë e lëndës plasëse.
Ndërkaq, banorët e njërës banesë, burrë e grua kanë mbetur të terrorizuar nga plasja e fortë e eksplozivit. “Dëgjuam një zhurmë të madhe. Na ra dera në tokë dhe u ndërpre energjia elektrike”, – kanë thanë ata. Në lidhje me shpërthimet, policia ka bërë të ditur se fatmirësisht nuk ka të lënduar në njerëz, por vetëm dëme të shumta materiale.
